Me pesticide të rrezikshme, specat e importuara nga Shqipëria tërhiqen nga tregu në Slloveni

Një ngarkesë me speca të kuq nga Shqipëria u tërhoq urgjentisht nga tregu në Slloveni pas zbulimit të pesticideve të rrezikshme në sasi të lartë.

Një ngarkesë me speca të kuq të eksportuar nga Shqipëria në Slloveni është tërhequr me urgjencë nga tregu, pasi analizat laboratorike kanë zbuluar nivel të lartë pesticidesh të rrezikshme për shëndetin.

Sipas autoriteteve sllovene, bëhet fjalë për pesticide si acetamiprid, formetanate dhe flonicamid, të cilat tejkalojnë kufijtë e lejuar. Produkti ishte importuar në Slloveni nga 24 gushti deri më 4 shtator, dhe ishte shpërndarë në kuti kartoni dhe plastike.

Klientët këshillohen ta kthejnë produktin ose ta hedhin. Kompania Geaprodukt, që ka importuar specat nga Shqipëria, ka dhënë urdhër për tërheqjen e menjëhershme të tyre nga tregu dhe ka kërkuar nga klientët që ta kthejnë produktin në vendin e blerjes, ose në rast se kjo nuk është e mundur, ta asgjësojnë vetë me kujdes.

Po ashtu, kompania ka paralajmëruar konsumatorët që mund të kenë konsumuar ose pasur kontakt me specat, të lajnë mirë duart dhe nëse ndiejnë probleme me tretjen apo të përziera, të kërkojnë menjëherë ndihmë mjekësore.

Eksportet bujqësore nga Shqipëria drejt vendeve të Bashkimit Europian po përballen gjithnjë e më shumë me kontrolle të rrepta për përmbajtjen e mbetjeve kimike dhe metaleve të rënda në produktet ushqimore.

Disa ditë më parë u bllokua gjithashtu një sasi prej 5.562 kg pjeshkë me origjinë nga Shqipëria, për shkak të nivelit të lartë të nikelit, përtej normave të lejuara nga BE.

Rasti është raportuar më 22 gusht 2025 nëpërmjet Sistemit të Alertimit të Shpejtë për Ushqimin dhe Ushqimin për Kafshët (RASFF), i cili njoftoi Autoritetin Kombëtar të Ushqimit në Shqipëri.

Sipas AKU-së, pjeshkët nuk kanë hyrë në tregun vendas, por ishin destinuar ekskluzivisht për eksport, ndërsa sasia është asgjësuar menjëherë në Kroaci pas daljes së analizave. /Ekofin.al

Më të lexuarat